Psalms 119

Goti ge'ae'mo ava gemae

1Vaya'mogimo alagepa kava'mo nehu'apae'mo vai'mo o'ali'a Ala kava ne'mo ke'aepa ge'amo akame nehaya vaya'mogi Goti aulagale'mo alagepa hu'a mai'nayanage'a afa'a apamogaga aigae. 2Avayafati'mo hu'niya ke'aepa ge'amo akame huge agesayafe'mo muki apaipafati'mo kahauya huge hu'a ne'maiya vaya'mogi Goti aulagale'mo alagepa hu'a mai'nayanage'a afa'a apamogaga aigae. 3Apakaemo mago hosu kava'mo osu'a Ala kava ne'mo kate'mo umenitata nehae. 4Kagaemo, lapayamukiki hutapa ge'nimo akame hiyo, huka hu'nane. 5Gekamo alagepa hu'na afite'na akame hisuvafe'mo ne'nahaiye. 6Muki gekamo agete'na afisuva afina'mo navagage osugiye. 7Nagaemo fatago kava'mo huka alika fako huka nehana gekamo alagepa hu'na afite'nae'mo alagepa fatago naipafati'mo ala kagikamo kamiguve. 8Avo'mo kae male'naya ke'aepa gekamo akame huguvanagi alagi nataleka o'uvo.

9Haiya kava huno neya vekamo'mo nehiya kava'amo afa'a aeno kalo paeno atalegaiye. Agaemo gekamo alagepa huno afisiya kavatetike'mo afa'a aeno kalo paeno atalegaiye. 10Muki naipafati'mo kagesuvafe'mo kahauya hu'nove. Hiyo, huka hu'nana ke'aepa gekamo atale'na visuvafe'mo o'natalo. 11Kagaetegamo hosu kava'mo osisuvafe'mo gekamo naipafi'mo ali'na fala ki male'nove. 12O Ala kava nene, hu'na, alagi alagepa huka mai'nane. Avo'mo kae male'naya ke'aepa gekamo alika naya malo. 13Nagaemo navayafati'mo muki gekamo fatago kava'mo huka kavayafati'mo alika fako nehana ke'aepa gekamo ae'na hakalo hu'na hapa pai'nove. 14Ma mopafi alopa kagemi yafe'mo apamogaga ne'aiya kava hu'na kavayafati'mo hu'nana gekamo akame hisuvafe'mo namogaga ne'auve. 15Nami'nana ke'aepa gekae'mo nagesa afifi hu'na maige ne'vana ka'mo age'na alagepa hu'na agege hu'na maiguve. 16Nagaemo avo'mo kae male'naya ke'aepa gekae'mo namogaga aite'na nage okanigiye.

17Kagaemo ali'yakamo ne'aluva vekakamo mago'e huka fiku alika namige'nao ma mopafi'mo afa'a mai'ne'nae'mo gekamo akame hino. 18Naulagamo alika ayakeka natege'nao ke'aepa gekamo agete'na nahau aiguve. 19Ma mopafi'mo nata ne'na ne'visugekae'mo gekamo afisuvafe'mo alika fala okika alika nave liyo. 20Muki afina'mo alika fako nehana ke'aepa gekamo afisuva naipamo nekaliya'mofe'mo naipafi'mo nagafu nekiye. 21Himu'namu kava'mo nehaya vaya'aife'mo huka faipa huka apate'nana vaya'mogimo kakamo atale'a ne'vagekae'mo ge nehapane. 22Kavayafati'mo hu'nana gekamo akame hu'nova'mofe'mo hu'a faipa hu'a natege hosu gemo huge nehagi apavayamo alika akani apatege'a afa'a maiyo. 23Ne'yagaiya vaya'mogimo fai mai'ne'apae'mo hu'a faipa hu'a nate'naya'monanafa ali'yakamo ne'aluva vekamo'na avo'mo kae male'naya ke'aepa gekae'mo nagesa afifi hu'na mai'nove. 24Kavayafati'mo hu'nana gekae'mo namogaga ne'auve. Gekamo'mo visuva ka'mo alino nave neliye.

25Nagupi mafa'nemo asagauno aiteno mopafi'mo mai'niye. Lapa maegauve, huka hu'nana gekamo akame huka alika he tika nato. 26Nagaemo nehuva kava'nie'mo kaha pai'nogekae'mo ge'nile'mo aeka atagaina huka naha pai'nane. Avo'mo kae male'naya ke'aepa gekamo alika naya malo. 27Alika naya malege'na nami'nana gemo aepa'amo afi'na alagepa hu'na afino. Ne'alina ali'yakamo agete'nae'mo nahau ai'nova kava'nie'mo hapa paiguve. 28Kanamo ali'nogeno nagupi mafa'nemo'mo ani hegekana hu'niye. Lokiya vai'na kategauve, huka hu'nana'mofe'mo lokiya vaika nato. 29Aigofe kate'mo o'visuvafe'mo ka akani maleteka ke'aepa gemo fiku alika namiyo. 30Lama ge kate'mo uguve, hu'na nagesa afi'nove. Alika fako hu'nana gemo ali'na naulagale'mo male'nove. 31Kavayafati'mo hu'nana gele'mo ali'na kamae'nove. O Ala kava nene, hu'na, navagage ya'mo alika o'namiyo. 32Mago'e huka naipa nagesamo alika namisanage'nae'mo nagu nagu hu'na gekamo hiyo, huka laha pai'nana gemo akame hu'na huguve.

33O Ala kava nene, hu'na, avo'mo kae male'naya ke'aepa gekamo alika naya malege'nao o'atale'na akame hume hume u'na hano hisiya afina'e'mo akame hino. 34Alagepa hu'na nagesamo afisuva ya'mo alika namige'nao ke'aepa gekamo akame hino. He, muki naipafati'mo akame huguve. 35Hiyo, huka laha pai'nana gekae'mo namogaga ne'auva'mofe'mo ani kate'mo u'ne'na hisuva naipamo alika kalika nato. 36Fiku yanage'na ma mopafi yafe'mo naha'ye hugiye. Kavayafati'mo hu'nana gekamo akame hisuva naipa nagesamo alika namiyo. 37Alu ya'mo aulu hae'na ne'agesugekae'mo alika aika afe leka nato. Kagae kate'mo ne'visugekae'mo alika he tika nato. 38Ali'yakamo ne'aluva vekamo'nafi'mo gekamo alika lokiya vaika ato, kagaefeke'mo koli nehuva'mofe'mae. 39Alagepa huka alika fako nehana'mofe'mo hosu kava'mo hisuge'apae'mo hu'a faipa hu'a natesayafe'mo koli nehuvanagi naha mao. 40Nami'nana gekae'mo naha'ye nehiye. Fatago kavakaleti'mo alika he tika nato.

41O Ala kava nene, hu'na, kahau huka nato. Huguve, huka hu'nana kava'mo huka nagufamo alika katika nato. 42Gekamoke'mo naha maegaiye, hu'na nehuva'mofe'mo huno faipa huno ne'nateya vekamo ge'ale'mo ae'na atagaina hu'na ha paiguve. 43Alika fako nehana gekae'mo nagesa afi'nae'mo, naha maegaiye, hu'na nehuva'mofe'mo lama gekamo navayafati'mo alika o'atalo. 44Ani kava hu'na mai'ne'nae'mo muki afina'ae'mo ke'aepa gekamo akame hume hume u'na maiguve. 45Nami'nana gekamo afisuvafe'mo kahauya nehuva'mofe'mo kalavusifi'mo o'mai'na afa'a maiguve. 46Nagaemo kavayafati'mo nehana gemo ali'na ne'yagaiya kini vaya'aife'mo ae'na hakalo hu'na hapa paisugeno'ae'mo navagage osugiye. 47Nagaemo nahau nayamopafi'mo ne'nahaiya gekae'mo hiyo, huka laha pai'nana gekae'mo namogaga aiguve. 48Nagaemo nahau nayamopafi'mo ne'nahaiya gekae'mo hiyo, huka laha pai'nana gekalefe'mo naya'mo ali'na asaga hute'na avo'mo kae male'naya gekae'mo nagesa afifi hu'na maiguve.

49Kagaemo ali'yakamo ne'aluva vekamo'nae'mo kaha maegauve, huka naha pai'nana gekae'mo halate kagesamo afika ho huvo. Ani gekae'mo nagesamo afi'nae'mo, alagi afole aigiye, hu'na hute'na navayagunagu hu'na maisuvafe'mo alika he tika nate'nane. 50Gekamo'mo alagepa hu'na maisuva ya'mo alino nami'niya'mofe'mo kana ya'mo ne'alugeno'ae'mo naipamo'mo falu nehiye. 51Apaki'apile'mo ali'a asaga hu'a ne'apataya vaya'mogimo kigi yokalo gege'mo hu'a ne'nataya'monanafa ke'aepa gekamo o'atale'nove. 52O Ala kava nene, hu'na, akeya'vilagamo gekamo alika fako nehana gekae'mo nagesamo afi'na ho hute'na naipamo ali'na falu hu'na ne'atove. 53Hosu vaya'mogimo ke'aepa gekamo ago amagi'a ne'atalaya'mofe'mo naipamo'mo atete nehiye. 54Nata ne'na e'na mai'nova no'nifi'mo avo'mo kae male'naya ke'aepa gekamo yoke hu'nove. 55O Ala kava nene, hu'na, hani'ilagamo kagikae'mo nagesamo afi'na ho nehu'nae'mo ke'aepa gekamo akame nehuve. 56Nami'nana gekamo akame hu'nova'mofe'mo ani ya'mo ali'nove.

57O Ala kava nene, hu'na, kagaemo hetama'nimo mai'nane. Nagaemo gekale'mo yagai'ne'na akame huguve, hu'na hu'nove. 58Nagaemo muki naipafati'mo, fiku naha maeka namiyo, hu'na kaha pai'nove. Nahau hu'na lapategauve, huka laha pai'nana kava huka kahau huka nato. 59Nagaemo kava'nie'mo nagesa afite'nae'mo ai'na afe le'na kavayafati'mo hu'nana gemo akame hu'nove. 60Hiyo, huka laha pai'nana gemo akame hisuvafe'mo afa'a o'mai'na malage hu'na he ti'na akame hu'nove. 61Hosu vaya'mogimo nofiteti'mo ki'a nate'naya'monanafa ke'aepa gekae'mo nage okani'niye. 62Kagaemo fatago kava'mo huka alika fako nehana'mofe'mo hani'ilaga folagu'mo he ti'na kahao ke hegauve. 63Nagaemo kagaefe'mo koli nehaya vaya'e'mo magokepi'mo lokaeta mai'none. Apami'nana gele'mo yagai'a ate'ne'a akame nehaya vaya'e'mo magokepi'mo lokaeta mai'none. 64O Ala kava nene, hu'na, kahau huka ne'apatana kavakamo'mo ma mopafi'mo havai te'niye. Avo'mo kae male'naya ke'aepa gekamo alika naya malo.

65O Ala kava nene, hu'na, Kaha maegauve, huka huteka ani kava huka ali'yakamo ne'aluva vekamo mago'e huka naha mae'nane. 66Nagaemo hiyo, huka hu'nana gekae'mo nagesamo afi'na fatago nehuva'mofe'mo alagepa naipa nagesamo alika namiyo. 67Kayo'mo o'nami'nanage'nae'mo hogote'na gekamo ago atale'nova'monanafa hemenimo gekamo akame nehuve. 68Alagepa kava'mo huteka alagepa vekamo yagu yaga kaipa vekamo mai'nananagi avo'mo kae male'naya ke'aepa gekamo alika naya malo. 69Himu'namu kava'mo nehaya vaya'mogi aigofe nava gemo hute'a hu'a faipa hu'a nate'naya'monanafa muki naipafati'mo nami'nana gekamo akame huguve. 70Apaipamo yafakana huno hane'nige'a afi'a aeto nosaya'monanafa ke'aepa gekae'mo amuse nehuve. 71Kayo'mo nami'nanage'nae'mo gekamo afi'nova'mofe'mo kayo'mo'a alagepa huno naha mae'niye. 72Kavayafati'mo hu'nana ke'aepa gekamo'mo tauseni monimo ago aeno agase'niya'mofe'mo gekae'mo mago'e huno ne'nahaiye.

73Kagaemo kayateti'mo nagupi mafa'nemo alo huka nateteka nagufamo alo huka nate'nane. Hiyo, huka laha pai'nana gemo afisuva nagesamo namiyo. 74Nagaemo gekamo'a naha maegaiye, hu'na hute'na navayagunagu hu'nova'mofe'mo kagaefe'mo koli nehaya vaya'mogi nagete'apae'mo apamogaga aigae. 75O Ala kava nene, hu'na, afi'novana alika fako nehana kava'mo alagepa kava'mo hane'nigeka gekamo akame huteka naha maesanafe'mo kana ya'mo alika nami'nane. 76Kagaemo ali'yakamo ne'aluva vekamo'nae'mo naha pai'nana gekamo akame huka alagepa huka kahau huka nateteka naipamo alika falu huka nato. 77Ke'aepa gekae'mo namogaga ne'auva'mofe'mo kahau huka natege'nao afa'a maino. 78Apaki'apile'mo ali'a asaga hu'a ne'ataya vaya'mogimo nagaetegamo hosu kava'mo hu'naya'mofe'mo apavagage hisiya ya'mo alika apamiyo. Nagaetegamo hosu kava'mo hu'naya'monanafa nami'nana ke'aepa gekae'mo nagesa afifi hu'na maiguve. 79Kagaefe'mo koli hute'a kagaemo kavayafati'mo hu'nana ke'aepa gekamo afi'naya vaya'mo alika aika atagineka apatege'apao nagaetegamo eyo. 80Nagaemo avo'mo kae male'naya ke'aepa gekale'mo ae'na hapaisuva naipa nagesamo alika namige'nao navagage osisiyafe'mo akame hino.

81Nagufamo alika katika natesanafe'mo lusi kava huno nahau'nigeno lokiya'nimo ago hano hu'niya'monanafa kaha maegauve, huka hu'nana gekae'mo nagesamo afite'na navayagunagu nehuve. 82Gekamo afole aisiya'ae'mo aulu he'na age'na mai'nogeno naulagafati'mo nagafu nekiye. Hainu afina'mo naha maeteka naipamo alika falu huka nategane. 83Nagaemo afu agufaleti'mo alo hu'naya ani kekana hu'na mai'nove. Halinamo ne'aigeno'ae'mo vai'niya ani kekana hu'na mai'nova'monanafa avo'mo kae male'naya ke'aepa gekae'mo nage okani'na nagesamo ne'afuve. 84Na magi afina'mo ali'yakamo ne'aluva vekamo'namo kana ya'mo ali'na maiguve. Hainu afina'mo apaini hu'a ne'nataya vaya'mo alika fako huka apateteka kayo'mo apamigane. 85Ala apaki alite'a apakufamo avaleli'a nehaiya vaya'mogimo kelifi'mo asagau'na aisuvafe'mo kelimo kafi male'nae. Ani kava'mo ke'aepa gekamo akame nosaya kava'mo hane'niye. 86Kagaemo muki hiyo, huka laha pai'nana gekamo alagi lama gemo hane'niye. Apakaetegamo hosu kava'mo osu'nova'monanafa apaini hu'a ne'natae. Naha mao. 87Ma mopafi'mo mai'noge'apae'mo ali'a hano hu'a natalesayafe'mo hu'nage'nae'mo hogo'amo faligefe'mo nehu'nae'mo nami'nana ke'aepa gekamo o'atale'nove. 88Nagaemo kavayafati'mo hu'nana ke'aepa gekamo akame hisuvafe'mo muki afina'ae'mo kahau kayamopafi'mo nekahaiya kavakaleti'mo alika he tika nato.

89O Ala kava nene, hu'na, gekamo alagi asagauno o'aigiya'monanafa koku'napi'mo lokiya vaino haneme haneme uno haneno hano osugiye. 90Kagaemo muki afina'mo gekamo akame huka afole aite'a falite'a hume hume ne'vaya vaya'aitegamo alagepa kava'mo nehane. Kagaemo ma mopamo faika ate'nanageno haneme haneme eno hemenimo hane'niye. 91Muki ya'amo alo hu'nanageno ke'aepa gekamo akame huno haneme haneme eno hemeni'e'mo afa'a hane'niye. Muki ya'amogimo ali'yakamo ne'aliye. 92Nagaemo ke'aepa gekae'mo namogaga o'ai'novesinana kana ya'mo ali'ne'nae'mo ago fali'novesine. 93Nami'nana ke'aepa gekae'mo muki afina'ae'mo nage okanigiye. Gekaleti'mo alagepa hu'na maisuva ya'mo alika nami'nana'mofe'mae. 94Nagaemo nami'nana ke'aepa gee'mo kahauya hu'nova'mofe'mo nagaemo kagaika vekamo mai'novanagi nagufamo alika katika nato. 95Hosu kava'mo nehaya vaya'mogimo namagisage'na falisuvafe'mo nagava mai'naya'monanafa kavayafati'mo hu'nana ke'aepa gekae'mo nagesa afifi hu'na maiguve. 96Nagaemo age'novana muki haino hapai'niya ya'mo ago hano hu'nige'na age'nove. Hano hu'niya'monanafa ke'aepa gekamo'mo yofo ya'amo'mo alopa ya'mo hane'niye.

97Nagaemo ke'aepa gekae'mo lusi kava huno nahau nayamopafi'mo nahau'niye. Nete'e une'e'mo gekae'mo nagesa afifi hu'na mai'nove. 98Muki afina'mo kagaemo hiyo, huka hu'nana ke'aepa gekamo nagae'e'mo magokepi lokaeno hane'niya'mofe'mo ke'aepa gekaleti'mo alika naya ne'malanage'nae'mo nagaemo afite'na age'nova kava'mo'a kame vaya'nimogi afite'a age'naya kava'apimo ago aeno agase'niye. 99Kavayafati'mo hu'nana gekae'mo nagesa afifi hu'na mai'nova'mofe'mo nagaemo gemo aepa'amo afi'nova kava'nimo'a tisa vaya'nimogi afi'naya kava'apimo ago aeno agase'niye. 100Nami'nana ke'aepa gemo akame nehuva'mofe'mo nagaemo gemo aepa'amo afi'nova kava'nimo'a kosuna vaya'mogi gemo aepa'amo afi'naya kava'apimo ago aeno agase'niye. 101Gekamo akame hute'na muki hosu kate'mo o'visuvafe'mo naiyamo kalavusi hu'na ate'nove. 102Kagaikamo alika naya male'nana'mofe'mo alika fako nehana gekamo o'atale'nove. 103Nagaemo gekamo ne'na afi ge'nogeno haga nahau'niye. Gekamo haga'amo'mo kevegeve anumo'mo nehiya haga'amo ago aeno agaseno haga nehiye. 104Nami'nana ke'aepa gemo'a gemo aepa'amo ne'afuva kava'mo alino nami'niya'mofe'mo muki aigofe gee'mo alagi o'nahau'niye.

105Gekamo'mo lamugana huno hane'neno'ae'mo aeno ha nelege'na umenitata nehuve. Gekamo'mo aeno ha leno visuva ka'mo alino nave neliye. 106Nagaemo, Alika fako nehana gekamo fatago gemo akame huguve, hu'na nago'yamo atale'na ago kaha pai'nove. 107O Ala kava nene, hu'na, lusi kana ya'mo ali'novanagi kaha maegauve, huka hu'nana gekalefe'mo alika he tika nato. 108Kahao ke hovanagi kagaefe'mo nahau nayamopafi'mo nahau'nige'na navayafati'mo hisuva gemo ofalinigana hu'na kamisuva ya'mo aliyo. Kagaemo alika fako nehana gemo alika naya malo. 109Nagaemo muki afina'mo afa'a ne'mauva ya'nimo atalesuva kavategamo mai'nova'monanafa ke'aepa gekae'mo nage okani'niye. 110Hosu vaya'mogimo natafausiyafe'mo ane'aimo hanagi male'naya'monanafa nami'nana ke'aepa gekamo amagi'na o'atale'nove. 111Mafa'ne'apimogimo afo'apimogi kagemi ya'apimo ne'aliya kava hu'na kavayafati'mo hu'nana ke'aepa gemo ali'novanageno hetama'nimo hanege hanege huno hanegaiye. Ani gekae'mo naipafi'mo namogaga ne'auve. 112Avo'mo kae male'naya ke'aepa gemo akame hume hume u'na falisuva afina'mo hano hisiyafe'mo naipamo ali'na he ti'na ate'nove.

113Nagaemo lole apakesamo ne'afiya vaya'aife'mo alagi o'nahau'niya'monanafa ke'aepa gekae'mo nahau nayamopafi'mo nahau'niye. 114Nagaemo kagaepi'mo fala ki'na mai'nogeka kagaemo halegu'nimo mai'nane. Gekamo alagi afole aigiye, hu'na hute'na navayagunagu hu'na mai'nove. 115Hosu kava'mo nehaya vaya'mogitapae, hu'na, nagaetegati'mo ataletapa viyo. Goti'nimo'mo hiyo, huno hu'niya gemo akame huguve. 116Alagepa hu'na afa'a maisuvafe'mo kaha maegauve, huka hu'nana gekalefe'mo nayate'mo aliyo. Afole aisiya kavafe'mo navayagunagu nehuva'mofe'mo fiku yanageno navagage hugiye. 117Nayate'mo aliyo, lageso osu'na afa'a maiguve. Afa'a mai'ne'na muki afina'mo avo'mo kae male'naya ke'aepa gekamo akame huguve. 118Muki vaya'mogi avo'mo kae male'naya ke'aepa gekamo amagi'a ne'atalaya vaya'mo kakame'yamo ne'apamine. Apakaemo aigofe kava'mo nehu'apae'mo apakai'apie'mo humi ne'apatae. 119Goli yafa'mo atafi'mo kae'nageno'ae'mo o'ani'ya'amo leno afole ai'nige'a ali'a ne'atalaya kava huka hosu vaya'mo alika ne'atalana'mofe'mo kavayafati'mo hu'nana ke'aepa gekae'mo nahau nayamopafi'mo nahau'niye. 120Nagaemo kagaefe'mo koli nehugeno'ae'mo nagufamo'mo atete ne'nahaiye. Alika fako nehana kavakae'mo koli nehuve.

121Nagaemo alagepa hu'na ali'na fako hu'na apatete'na fatago kava'mo hu'nove. Kana ya'mo ali'a ne'namiya vaya'ai apayapi'mo maisuvafe'mo alagi nataleka o'uvo. 122Anona'nilefe'mo eka naimu'yale'mo maige'nao alagepa hu'na maino. Fiku yanage'a ala apaki alite'a apakufamo avaleli'a nehaiya vaya'mogi kana ya'mo ali'a namigayanagi naha mao. 123Nagufamo alika katika natesanafe'mo aulu he'na agege fatago kavakalefe'mo gekamo agesuvafe'mo aulu hae'na agege hu'na age'na mai'nogeno naulagafati'mo nagafu nekiye. 124Kahau huka ne'apatana kava huka kahau huka nateteka avo'mo kae male'naya ke'aepa gekamo alika naya malo. 125Nagaemo ali'yakamo ne'aluva vekamo mai'nove. Nagaemo kavayafati'mo ke'aepa gekamo huge'na gekamo aepa'amo afisuva kava'mo alika namiyo. 126O Ala kava nene, hu'na, apakaemo ke'aepa gekamo ago ae'a ati kae'naya'mofe'mo ali'yakamo alisana afina'mo afole ai'niye. 127Gekamo ae'a ati kae'naya'mofe'mo hiyo, huka hu'nana gekalefe'mo nahau'niya kava'mo'a hogote goli yafafe'mo nahau'niya kava'mo ago aeno agase'niye. 128Gekamo ae'a ati kae'naya'mofe'mo muki kavatefe'mo nami'nana ke'aepa gekae'mo, fatago gemo hane'niye, hu'na nagesamo afite'na aigofe kavafe'mo alagi o'nahau'niye.

129Kavayafati'mo hu'nana ke'aepa gekae'mo nahau ne'auva gemo hane'niya'mofe'mo nagupi mafa'nemo'mo akame nehiye. 130Gekamo'mo vaya'ai apaipafi'mo faleno haiteno'ae'mo aeno ha nele. Negi vaya'mogi gekamo afite'apae'mo ge aepa'amo afigae. 131Hiyo, huka hu'nana gekae'mo naga te'nige'nae'mo navayamo aka hulina ha ha hu'nove. 132Kagikae'mo hapau apayamopafi'mo hapau'niya vaya'aitegamo nehana kava huka nagaefe'mo kahau huka nato. 133Kagaemo gekaleti'mo alika ho huka nateteka hosu kava'mo'a yagaino o'natesiyafe'mo nataleka o'uvo. 134Nami'nana ke'aepa gekamo akame hisuvafe'mo kana ya'mo ali'a nami'naya kavapati'mo hatu maeka nato. 135Kaugosafati'mo ha le yakamo'a ali'yakamo ne'aluva vekamo'nale'mo aeno ha leno. Avo'mo kae male'naya ke'aepa gekamo alika naya malo. 136Vaya'mogimo ke'aepa gekamo akame nosaya'mofe'mo lusi kava huno naunu nelamiye.

137O Ala kava nene, hu'na, fatago vekamo mai'neka alagepa fatago kava'mo huka alika fako huka ne'atane. 138Kavayafati'mo hiyo, huka hu'nana ke'aepa gekamo fatago gemo alagi lama gemo hane'niye. 139Kame vaya'nimogi gekae'mo apake kani'niya'mofe'mo nayamukiki nehuva kava'nimo'a atagana huno leno nasaga li'niye. 140Gekamo alagi alagepa gemo hane'niya'mofe'mo ali'yakamo ne'aluva vekamo'namo gekae'mo nahau nayamopafi'mo nahau'niye. 141Ala vekamo o'mai'noge'apae'mo nagaefe'mo ina agufa ne'mo mai'niye, hu'a nehaya'monanafa nami'nana ke'aepa gekae'mo alagi nage okani'niye. 142Fatago kavakamo'mo hanege hanege huno muki afina'ae'mo hanegaiye. Ke'aepa gekamo alagi lama gemo hane'niye. 143Hanageke ya'mo nagaete'mo afole ai'nigeno nagafu ki'niya'monanafa hiyo, huka hu'nana gekae'mo namogaga ne'auve. 144Kavayafati'mo hu'nana ke'aepa gekamo fatago kava'amo'mo alagi hanege hanege huno muki afina'ae'mo hanegaiye. Kagaemo gemo aepa'amo afisuva kava'mo alika namige'nao afa'a maino.

145Nagaemo muki naipafati'mo, Ala kava nene, hu'na, ge'nimo afiyo, avo'mo kae male'naya ke'aepa gekamo akame huguve, hu'na kagaefe'mo ge nehuve. 146Nagaemo, Nagufamo alika katika natege'nao kavayafati'mo hu'nana ke'aepa gekamo akame hino, hu'na kagaefe'mo ge nehuve. 147Ko oti'nige'nae'mo he ti'na, naha mao, hu'na ge nehuve. Gekamo afole aigiye, hu'na navayagunagu hu'na mai'nove. 148Nagaemo gekae'mo nagesa afifi hu'na maisuvafe'mo hani'ilagamo nau okale'na afa'a mai'nove. 149O, Ala kava nene, hu'na, kahau kayamopafi'mo kahau'niya kavakaleti'mo ge'nimo afiyo. Alagepa huka alika fako nehana kavakaleti'mo alika he tika nato. 150Hosu kava'mo nehaya vaya'mo nahaopale'mo e'nae. Apakaemo ke'aepa gekamo hanetege'apae'mo afagi'ale'mo mai'nae. 151O Ala kava nene, hu'na, kagaemo nahaopale'mo mai'nanageno'ae'mo muki gekamo hiyo, huka hu'nana gekamo alagi lama gemo hane'niye. 152Nagaemo akeya'vilagamo kavayafati'mo hu'nana ke'aepa gekamo faika ate'nana'mofe'mo muki afina'mo afa'a hanegaiye, hu'na ago afi'nove.

153Nagaemo ke'aepa gekae'mo nage okani'niya'mofe'mo kana ya'mo ali'novanagi kagesamo afiteka hatu maeka nato. 154Agotile'mo he tika mai'neka naha maeka hatu maeka nato. Kaha maegauve, huka hu'nana gekalefe'mo alika he tika nato. 155Hosu vaya'mogimo avo'mo kae male'naya ke'aepa gekae'mo kahauya nosaya'mofe'mo apakufamo alika katika apatesanafe'mo afagi'ale'mo mai'nae. 156O Ala kava nene, hu'na, Lusi kava huka kahau huka apatege apatege huka kahau huka ne'apatane. Alagepa huka alika fako nehana kavakaleti'mo alika he tika nato. 157Asole vaya'mogi apaini hu'a natege kame hu'a natege hu'a mai'naya'monanafa kavayafati'mo hu'nana ke'aepa gekamo atale'na o'u'nove. 158Hosu kava'apimo ae'a ati kae'naya vaya'mogi gekamo akame nosaya'mofe'mo apake'nogeno'ae'mo naipamo'mo kana hu'niye. 159Nami'nana ke'aepa gekae'mo nahau nayamopafi'mo nahau'niya kava'nie'mo kagesamo afiyo. Kahau kayamopafi'mo kahau'niya kavakaleti'mo alika he tika nato. 160Akeya'vilaga aepa fai'niya afi'nateti'mo hane'niya gekamo alagi lama gemo hane'niye. Muki gekamo alika fako nehana gekamo'mo hanege hanege huno muki afina'ae'mo hanegaiye.

161Ala vaya'mo ne'yagaiya vaya'mogi apaini hu'a ne'nataya kava'apimo aepa vekamo o'mai'nova'monanafa gekaeke'mo koli nehuve. 162Vaya'mogi kame hu'a ae'a apakasete'a alopa kagemi ya'mo alite'apae'mo apamogaga ne'aiya kava hu'na gekae'mo namogaga ne'auve. 163Aigofe gee'mo alagi o'nahau'niya'monanafa ke'aepa gekae'mo nahau nayamopafi'mo nahau'niye. 164Fatago kava'mo huka alika fako nehana'mofe'mo muki afina'ae afina'ae'mo seveni'a afina'mo kahao ke nehove. 165Ke'aepa gekae'mo hapau apayamopafi'mo hapau'niya vaya'mogi alagepa hu'a mai'nageno apaipamo'mo falu nehiyanageno mago ya'mo'a apavalelino asagauno aisiya ya'mo ohane'niye. 166Ala kava nene, hu'na, nagufamo alika katika natesanafe'mo navayagunagu hu'na mai'ne'na hiyo, huka hu'nana gemo akame nehuve. 167Nagupi mafa'nemo'a kavayafati'mo hu'nana ke'aepa gekamo akame nehigeno'ae'mo lusi kava huno nahau nayamopafi'mo ne'nahaiye. 168Muki nehuva kava'a'nimo kaulagale'mo hane'niya'mofe'mo nami'nana ke'aepa geka'e kavayafati'mo hu'nana ke'aepa geka'e'mo akame nehuve.

169O Ala kava nene, hu'na, lokiya vai'na ge nehuva ge'nimo afiyo. Lapa maegauve, huka hu'nana gekalefe'mo gemo aepa'amo afisuva kava'mo alika namiyo. 170Aukaya nehuva ge'nimo afiyo. Lapa maegauve, huka hu'nana gekalefe'mo hatu maeka nato. 171Kagaemo avo'mo kae male'naya ke'aepa gekamo alika naya ne'malana'mofe'mo ala kagikamo kamiguve. 172Muki gekamo hiyo, huka hu'nana gekamo fatago gemo hane'niya'mofe'mo navayafati'mo gekamo ae'na hakalo hu'na hapa paiguve. 173Nami'nana ke'aepa gekamo lekana pai male'nova'mofe'mo kayateti'mo naha mao. 174O, Ala kava nene, hu'na, nagufamo alika katika natesanafe'mo naga nete. Ke'aepa gekae'mo namogaga ne'auve. 175Afa'a maisuva ya'mo alika namige'nao ala kagikamo kamino. Alika fako huka nateteka naha mao. 176Nagaemo hiyo, huka hu'nana gekae'mo nage okani'niya'mofe'mo kahauya huka nago. Lageso hu'niya sipisipigana hu'na katale'na u'novanagi ali'yakamo ne'aluva vekamo kahauya huka nageka navato.